Tesla-ի թռչող էլեկտրամեքենան

Իլոն Մասկը ներկայացրել է Tesla-ի մինչ օրս ամենահավակնոտ նախագծերից մեկը՝ Roadster-ը, որի շնորհանդեսը ապշեցրել է ներկաներին։ Նախատիպը նախ ցուցադրել է շրջված դիրքով շարժվելու իր կարողությունը, ապա կատարել օդ բարձրանալու մանևր։

Հենց այդ պատճառով միջոցառումն անցկացվել է բացօթյա տարածքում։ Հատուկ օդամղիչների օգնությամբ մեքենան շարժվել է թեքահարթակի վրա՝ շրջված դիրքով։ Վերջին պահին գործարկվել են SpaceX-ի փոքր հրթիռային շարժիչները, որոնք Roadster-ը բարձրացրել են օդ։ Տպավորիչ թռիչքից հետո մեքենան անվտանգ վայրէջք է կատարել։

«Այն գործնականում հրթիռի պես է թռչում և, այսպես ասած, կարող է անհավանական ակրոբատիկ հնարքներ կատարել», - ասել է Մասկը՝ կատակով հավելելով, որ սա այնքան էլ անվտանգությանն առաջնահերթություն տվող մեքենա չէ։

Մասկը նշել է, որ Roadster-ը իրական մեքենա է լինելու՝ նախատեսված հանրային ճանապարհներով երթևեկելու համար։ Նա մանրամասներ չի հայտնել տեխնիկական բնութագրերի կամ գնի մասին, սակայն հաստատել է, որ արտադրությունը նախատեսվում է սկսել 2028 թվականին։

Միջոցառման ընթացքում Roadster-ի նախատիպը նաև արագացման փորձարկումներ է անցել՝ հետևի հատվածում տեղադրված չորս հրթիռային շարժիչների օգնությամբ։ 0-ից մինչև 100 կմ/ժ առաջին արագացման փորձի ժամանակ այն գրանցել է ուղիղ 1 վայրկյան արդյունք։ Երբ Մասկին հիշեցրել են ավելի վաղ տված խոստումը՝ այդ ցուցանիշը մեկ վայրկյանից ցածր դարձնելու մասին, Roadster-ը երկրորդ փորձի ժամանակ նույն արագացումը կատարել է ընդամենը 0,8 վայրկյանում։ Մասկի խոսքով՝ սա սահմանը չէ, և սպասվում են ավելի լավ արդյունքներ։

Ինչ վերաբերում է առավելագույն արագությանը, ակնկալվում է, որ նոր Roadster-ը կգերազանցի 370 կմ/ժ-ը։ Սակայն Tesla-ի վերջնական նպատակը ձայնի արագության կեսին՝ մոտավորապես 616 կմ/ժ-ի, հասնելն է։ «Այն կգերազանցի բոլոր գործող ռեկորդները՝ ցանկացած մրցուղում», - հայտարարել է Մասկը։

Հետաքրքիր է, որ շնորհանդեսի ընթացքում ցուցադրված մեքենայում վարորդ չի եղել։ Այս որոշումն ընդունվել է անվտանգության նկատառումներից ելնելով։