3 ყველაზე რთულად შეძენადი კლასიკური ავტომობილი

კლასიკური ავტომობილების ბაზარი ბოლო ათწლეულების განმავლობაში ავტოინდუსტრიის ერთ-ერთ სტაბილურად მზარდ სეგმენტად იქცა. თუ წარსულში ვინტაჟური ავტომობილების შეძენა ძირითადად ენთუზიასტებისა და კერძო კოლექციონერების ინტერესის სფეროს წარმოადგენდა, დღეს ეს მიმართულება უკვე ინვესტიციის, კულტურული მემკვიდრეობისა და საავტომობილო ისტორიის შენარჩუნების მნიშვნელოვან ნაწილად მიიჩნევა. 

მიუხედავად ამისა, არსებობს ავტომობილები, რომელთა შეძენა ფინანსურ შესაძლებლობებზე გაცილებით მეტად, მათ ხელმისაწვდომობაზეა დამოკიდებული. ზოგიერთი მოდელი იმდენად იშვიათია, რომ საერთაშორისო აუქციონებზეც კი ათწლეულების განმავლობაში არ ჩნდება, მათი მფლობელები ავტომობილებს თაობიდან-თაობას გადასცემენ და ბაზარზე თითქმის არასოდეს გამოაქვთ.

ასეთი ავტომობილების ღირებულებას მხოლოდ ასაკი ან ბრენდის პოპულარობა არ განსაზღვრავს. განსაკუთრებულ მნიშვნელობას წარმოებული ეგზემპლარების რაოდენობა, კონკრეტული მოდელის ისტორიული როლი, ტექნიკური ავთენტურობა, ორიგინალური მდგომარეობა და მისი მფლობელობის ისტორია იძენს. 

ამ კატეგორიაში განსაკუთრებული ადგილი უკავია Ferrari 250 GTO-ს, რომელიც კლასიკური ავტომობილების სამყაროში ერთგვარ ეტალონად მიიჩნევა. 1962-1964 წლებში მისი მხოლოდ 36 ეგზემპლარი გამოუშვეს, რაც მას წარმოების პერიოდშივე განსაკუთრებულად იშვიათ ავტომობილად აქცევდა. 

ავტომობილი თავდაპირველად საერთაშორისო ავტოსპორტისთვის შეიქმნა, თუმცა დროთა განმავლობაში მისი მნიშვნელობა სარბოლო ისტორიას გასცდა. წარმატებული ტექნიკური გადაწყვეტები, დახვეწილი იტალიური დიზაინი და შეზღუდული რაოდენობა Ferrari 250 GTO-ს იმ ავტომობილთა რიცხვში აყენებს, რომელთა გამოჩენა საერთაშორისო აუქციონებზე ყოველთვის განსაკუთრებული მოვლენაა. სწორედ ამიტომ, მისი შეძენა გაცილებით რთულია, ვიდრე მისი რეკორდული ღირებულების გადახდა.

არანაკლებ გამორჩეულია Mercedes-Benz 300 SLR Uhlenhaut Coupé, რომელიც მსოფლიო ავტოისტორიაში ერთ-ერთ უიშვიათეს ავტომობილად მიიჩნევა. 1955 წელს მხოლოდ ორი ეგზემპლარი შეიქმნა და ორივე მათგანი მრავალი წლის განმავლობაში მწარმოებლის საკუთრებაში რჩებოდა. ავტომობილი იმ პერიოდის სარბოლო ტექნოლოგიებს საგზაო ავტომობილის კონცეფციასთან აერთიანებდა. ამის გამო მას ინჟინრული თვალსაზრისითაც განსაკუთრებული ადგილი უკავია. როდესაც ერთ-ერთი ეგზემპლარი გაიყიდა და მსოფლიო ავტობაზარზე ისტორიული რეკორდი დაამყარა, ამით კიდევ ერთხელ ნათლად დადასტურდა ავტომობილის უნიკალურობა და ექსკლუზიურობა. მსგავსი შემთხვევები იმდენად იშვიათია, რომ ამ მოდელის ბაზარზე გამოჩენა პრაქტიკულად გამონაკლის მოვლენად მიიჩნევა.

თუ წინა ორი მოდელი განსაკუთრებული საინჟინრო და სპორტული მემკვიდრეობით გამოირჩევა, Bugatti Type 57SC Atlantic პირველ რიგში საავტომობილო დიზაინის ერთ-ერთ უმაღლეს მიღწევად არის აღიარებული. 1930-იანი წლების ბოლოს სულ ოთხი ავტომობილი დამზადდა, რომელთაგან ერთ-ერთი დღემდე დაკარგულად ითვლება. დარჩენილი ეგზემპლარები კერძო კოლექციებსა და მუზეუმებში ინახება და მათი გაყიდვა უიშვიათეს მოვლენას წარმოადგენს. გამორჩეული აეროდინამიკური ფორმები, ხელით დამზადებული კორპუსი და ისტორიული მნიშვნელობა ამ მოდელს არა მხოლოდ კოლექციონერებისთვის, არამედ საავტომობილო დიზაინის მკვლევრებისთვისაც განსაკუთრებულ ინტერესის საგნად აქცევს.

იშვიათი კლასიკური ავტომობილის შესაძენად მხოლოდ შესაბამისი ფინანსები საკმარისი არ არის. უმნიშვნელოვანესი ფაქტორებია ინფორმაციის სწრაფი ხელმისაწვდომობა, საერთაშორისო ბაზრების მუდმივი მონიტორინგი, ავტომობილის ისტორიის დეტალური გადამოწმება და მისი ტექნიკური მდგომარეობის პროფესიონალური შეფასება.

წყაროები: 

https://newsroom.bugatti.com/press-releases/bugatti-type-57-sc-atlantic-a-style-icon

https://www.ferrari.com/en-GE/magazine/articles/the-most-celebrated-car-ever-made

https://www.mercedes-benz.com/en/innovation/milestones/uhlenhaut-coupe-300-slr/