Elektrik Cayenne – Porsche-un irsində yeni bir səhifə

2026-cı il elektrik avtomobilləri həvəskarları üçün həyəcanverici xəbərlə başlayıb. “Porsche” yeni, tam elektrikli “Porsche Cayanne” modelini təqdim edib.

Sürət və komfort arasında seçim etmək istəməyənlər üçün hazırlanan bu model, Formula E texnologiyasından ilhamlanıb. Ultra-sürətli şarj imkanları və tamamilə yenidən dizayn olunmuş daxili interyer onu digərlərindən fərqləndirən əsas elementlərdir.

Elektrikli “Cayenne” həm sürətlənmə, həm də güc baxımından heyranedici göstəricilərə malikdir. İndiyə qədər istehsal edilmiş ən güclü “Porsche” modeli olan 1140 at güclü “Cayenne Turbo”, 0-dan 100 km/saat sürəti cəmi 2,4 saniyəyə yığır.

“Porsche”nin lüks kimliyi qorunsa da, interyer dəyişiklikləri o qədər əhatəlidir ki, əvvəlki modellərdən demək olar ki, yalnız sükan və güzgü detalları saxlanılıb. Avtomobil, “Porsche” tarixinin ən böyük rəqəmsal displeyi ilə təchiz olunub.

Şarj innovasiyası da diqqət çəkir: cəmi 10 dəqiqəlik sürətli şarj 300 km məsafə qət etmək üçün kifayətdir. Tam şarjla isə avtomobil 500 km-dən çox yol qət edə bilir.

Hazırda avtomobil yalnız öncədən sifariş üçün əlçatandır və ilin ikinci yarısında bazara daxil olması gözlənilir. Standart model 109,000 dollardan, “Turbo” versiyası isə 163,000 dollardan başlayan qiymətlərlə təklif olunacaq.

Benzinli və hibrid modellərin istehsalı isə davam edəcək. Onların istehsaldan çıxarılması isə hələlik planlaşdırılmır.