Ո՞ր ավտոմեքենաների բրենդներն են ամենաշատը որոնվում Google-ում

Ավտոմեքենաների բրենդների նկատմամբ հետաքրքրությունը մշտապես փոփոխվում է, իսկ որոնողական համակարգերի տվյալները հստակ ցույց են տալիս, թե որ արտադրողներն են ամենաշատ ուշադրությունը գրավում։ Google Trends-ի վերջին հաշվետվությունների համաձայն՝ որոնումների վիճակագրությունը բացահայտում է, թե աշխարհի որ ավտոմոբիլային բրենդներն են ամենաշատը որոնվում։

Այս տարվա տվյալների համաձայն՝ համաշխարհային որոնումների վարկանիշում ակնհայտորեն գերակշռում են երեք բրենդներ։

Չնայած Toyota-ն շարունակում է մնալ աշխարհում ամենաշատ որոնվող ավտոմոբիլային բրենդը, դրա որոնումների ծավալը 2022 թվականից աստիճանաբար նվազում է։ Այնուամենայնիվ, ճապոնական արտադրողը շարունակում է առաջատար լինել 57 երկրում՝ հատկապես Աֆրիկայում, Ասիայում և Հարավային Ամերիկայում։

Toyota-ին շատ մոտ է BMW-ն, որը վերջին տարիներին հաջողությամբ վերականգնել է իր համաշխարհային դիրքերը։ Գերմանական ավտոարտադրողն այժմ գլխավորում է որոնումների վարկանիշը Կենտրոնական և Արևելյան Եվրոպայում՝ Toyota-ից հետ մնալով ընդամենը մի քանի երկրներով։

Իսկ ի՞նչ կարելի է ասել Tesla-ի մասին։ Բոլոր ավտոմեքենաների կատեգորիաներում Tesla-ն զբաղեցնում է երրորդ տեղը և միաժամանակ աշխարհի ամենաշատ որոնվող էլեկտրական ավտոմեքենաների բրենդն է։ Այն առաջատար է նաև ԱՄՆ-ի և Չինաստանի նման խոշոր ավտոմոբիլային շուկաներում։

Թեև այս երեք բրենդները շարունակում են գերիշխել համաշխարհային որոնումների վարկանիշում, առցանց հետաքրքրության ամենաարագ աճը գրանցում են Չինական BYD-ն և Գերմանական Mercedes-Benz-ը։

BYD-ի մատչելի և տեխնոլոգիապես առաջադեմ էլ․ մեքենաները գրավել են սպառողների ուշադրությունը։ Միևնույն ժամանակ Mercedes-Benz-ը զգալիորեն ամրապնդել է իր դիրքերը նախորդ տարիների համեմատ։

Էլեկտրական և հիբրիդային ավտոմեքենաների նկատմամբ համաշխարհային պահանջարկը շարունակում է կայուն աճել։ Այս միտումը պահպանվում է արդեն մի քանի տարի և վկայում է, որ առաջիկա տարիներին չինական և եվրոպական էլեկտրամեքենաների արտադրողների միջև մրցակցությունը կդառնա էլ ավելի սուր՝ ներառյալ որոնողական վարկանիշներում։

Այսօր սպառողները գնալով ավելի հաճախ ընտրություն են կատարում երկու առաջնահերթությունների միջև՝ մի կողմից գործնականությունն ու առաջատար տեխնոլոգիաները, իսկ մյուս կողմից՝ պրեմիում որակը, զգացմունքային գրավչությունն ու ճանաչված ավտոմոբիլային բրենդի հեղինակությունը։