Արհեստական բանականությամբ աշխատող ավտոմեքենաների դիագնոստիկա

Ավտոմեքենաների դիագնոստիկան միշտ չէ, որ ճշգրիտ է լինում։ Շատ վարորդներ դիմում են սպասարկման կենտրոն՝ հույս ունենալով արագ հայտնաբերել խնդիրը, սակայն ստանում են ոչ հստակ կամ ոչ լիովին վստահելի պատասխաններ։

Հենց սա էլ  նպատակ ունի փոխել AutoSonix ընկերությունը։

Ընկերության արհեստական բանականությամբ (AI) աշխատող սարքը միանում է անմիջապես ավտոմեքենային, «լսում» է դրա աշխատանքը և ձայները վերածում իրական ժամանակում ստացվող ախտորոշիչ տվյալների։ Այս նորարարական տեխնոլոգիան հնարավորություն է տալիս ինչպես մեխանիկներին, այնպես էլ ավտոմեքենաների սեփականատերերին հայտնաբերել անսարքությունները՝ օգտագործելով միայն ձայնային ալիքները։

Ինչպե՞ս է այն աշխատում

Համակարգը հիմնված է մեքենայական ուսուցման ալգորիթմների վրա, որոնք ուսուցանվել են հազարավոր ձայնագրությունների միջոցով։ Տվյալների բազան ներառում է ինչպես ճիշտ աշխատող շարժիչի ձայնը, այնպես էլ մաշված գոտիների, տուրբոներմղիչների և ավտոմեքենայի այլ բաղադրիչների բնորոշ ձայները։

Արհեստական բանականությունն առանձնացնում և զտում է ձայները, այնուհետև համեմատում դրանք ակուստիկ բնութագրերի իր գրադարանի հետ։ Այս համեմատությունների հիման վրա այն ձևավորում է դիագնոզ, որի ճշգրտությունը շատ դեպքերում կարող է գերազանցել նույնիսկ փորձառու մեխանիկների գնահատականը։

Այս փուլում տեխնոլոգիայի հիմնական նպատակը ժամանակի խնայողությունն է, ախտորոշման գործընթացի պարզեցումը և ավտոմեքենաների սպասարկումն ավելի հասանելի դարձնելը։

Տեխնոլոգիան մշակող ընկերությունները կարծում են, որ ապագայում նման AI համակարգերը կներառվեն անմիջապես ավտոմեքենաների մեջ։ Ավտոմեքենաները կկարողանան ինքնուրույն վերահսկել իրենց տեխնիկական վիճակը, հայտնաբերել հնարավոր անսարքությունները և նախազգուշացնել վարորդներին՝ մինչև խնդրի լուրջ դառնալը։

Թեև արհեստական բանականությունը դժվար թե ամբողջությամբ փոխարինի պրոֆեսիոնալ մեխանիկներին, այն կդառնա հզոր գործիք, որը կդարձնի ավտոմեքենաների սպասարկումն ավելի արագ, ավելի ճշգրիտ և ավելի հուսալի։